Një mini-autobus bashkë me stacionin, “parkoi” prej datës 8 Qershor në krah të ndërtesës së Bashkisë Tiranë. Çdo ditë, deri në fund të muajit Qershor 2022, fëmijë të moshës 7 deri 10 vjeç u organizuan nga shkollat 9-vjeçare të qytetit dhe nga kampet e ndryshme verore, ku u informohuan por edhe argëtuan pranë këtij instalacioni të veçantë. “Udhëto me përgjegjësi” është fushata edukuese që Agjencia e Mbrojtjes së Konsumatorit, zbatoi nga Qershori e deri në fund të muajit Shtator 2022, me fokus të qenit “Pasagjer i Përgjegjshëm”. Qëllimi i fushatës, e cila u prit mjaft mirë nga fëmijët ishte pikërisht njohja saktë me rregullat e përdorimit të trasportit publik dhe shërbimin që duhet të na ofrohet. Duke qenë të mirë informuar, do të dimë edhe si t’i kërkojmë në mënyrën e duhur shërbimet e munguara. Fëmijët bashkë me specialistët dhe kontrollorët e transportit publik të AMK-së informohen dhe edukohen përmes lojës në grup. Ata vendosen si në rolin e udhëtarit, shoferit apo faturinos. Duke qenë se kjo fushatë edukuese dhe argëtuese u mirëprit mjaft mirë, nisma u bë pjesë edhe e Automotive Fair Albania përgjatë fundjavës së fundit të Qershori si dhe më pas u përfshi në kampin veror që Delegacioni i Bashkimit Europian në Tiranë, organizon gjatë muajve te verës në Parkun e Liqenit. Gjithashtu, në bashkëpunim me Agjencisë e Parqeve dhe Rekreacionit, orët edukuese dhe lojërat u zhvilluan edhe gjatë Kampit Veror që organizohet nga Agjencia po pranë Liqenit Artificial të Tiranës.
