Agjencia e Mbrojtjes së Konsumatorit, institucion në varësi të Bashkisë së Tiranës, shpall
procedurën e konkurimit për vendin e lirë të punës për pozicionin:
-1 (një) vend i lirë pune, specialist zëvendësues, sektori i informimit dhe pritjes së ankesave, (Kategoria IV-a);
-Disa nga detyrat që duhet të kryejë specialisti janë:
- Informon kërkuesin, nëse ka ose jo në zotërim informacionin e kërkuar.
- Mundëson për çdo kërkues të drejtën për t’u njohur me informacionin publik, në bashkëpunim me punonjësit e protokollit dhe të arkivës së agjencisë, sipas legjislacionit në fuqi. E drejta e kërkuesit realizohet duke i mundësuar konsultimin me dokumentin origjinal ose duke marrë një kopje të njehsuar të tij.
- Mundëson dhënien e kopjeve të njehsuara të dokumentacionit të njehsuar, në bashkëpunim me punonjësit e protokollit dhe të arkivës, duke përcaktuar llojin dhe sasinë e informacionin që do të jepet dhe duke e pasqyruar atë në shkresën përkatëse, bazuar në kërkesat e Kodit të Procedurës Administrative të Republikës së Shqipërisë, si dhe duke pasur parasysh kufizimet e përcaktuara në dispozitat ligjore në fuqi dhe posaçërisht në Ligjin për Mbrojtjen e të Dhënave Personale.
- Krijon, mban, publikon dhe përditëson regjistrin e kërkesave dhe përgjigjeve brenda afatit të parashikuar në pikën 1, të nenit 8 të ligjit material.
- Bashkërendon punën mes sektrorëve dhe drejtorive të agjencisë për plotësimin e kërkesave për informacione brenda afateve dhe sipas mënyrës së parashikuar në ligj.
- Rregjistron kërkesat për informacion dhe cakton një numër rendor për secilën prej tyre, në një regjistër të posaçëm fizik dhe elektronik.
- Dërgon kërkesën për informim te një autoritet tjetër publik, brenda afateve të parashikuara në ligjin material, kur rezulton se agjencia me cilësinë e autoritetit publik ku është depozituar kërkesa, nuk është institucioni fondkrijues i dokumentacionit, apo kur agjencia zotëron pjesërisht dokumentacionin e kërkuar, si pjesë e një procedure më të gjerë administrative.
- Verifikon rastet për dhënien falas të informacionit qytetarëve, sipas parashikimit të pikës 5, të nenit 13, të ligjit material.
- Kryen njoftimet paraprake si dhe komunikon me kërkuesin, sipas nevojës për trajtimin e kërkesës për informacion publik.
- Krijon kushtet për koordinim dhe bashkrendim të punës së tij, me Koordinatorin për të Drejtën për Informim të Bashkisë së Tiranës.
- Është përgjegjës për ndjekjen e korrespondencës dhe zgjidhjen e kërkesave ose ankesave të bëra nga subjekte fizikë apo juridikë në emër të agjencisë, pranë Komisionerit për të Drejtën e Informimit dhe Mbrojtjen e të Dhënave Personale.
- Zbaton çdo detyrë tjetër lidhur me fushën e tij të kompetencave, e cila i ngarkohet nga drejtori i përgjithshëm, drejtori i drejtorisë apo përgjegjësi i sektorit.
Dokumentat që aplikanti për specialist duhet të paraqesë janë si më poshtë:
- CV;
- Kopje ID;
- Diplomë (Bachelor dhe/ose Master Profesional/Shkencor) ose Diplomë e Nivelit të Dytë, dhe listë notash të noterizuara;
Afati për dërgimin e CV-ve, Diplomës dhe ID, të skanuar në adresën elektronike [email protected] dhe/ ose me postë në adresën: rruga ‘‘Murat Toptani”, 1001, ndërtesa 12, kati 2, Tiranë, është deri me datë 06.11.2024, ora 16:00.